13 Desemba 2021
Gud afternoon long yumi evriwan.
Mi wantem blong tekem oppotuniti ia blong apdeitem pablik long wan pasenja we hemi kasem Vanuatu long 24th Novemba 2021, long wan flaet we I kam long Fiji, mo wan narafala pasenja we hemi kasem Vanuatu long wan flaet we hemi kam long ostralia.
Ministri blong helt hemi konfemem tufala pasenja ia olsem aktif keis blong COVID-19. Tufala pasenja ia i stap long kwarantin mo tufala i no kat eni simptom blong COVID-19. Bambae Ministri hemi sendem ol sampol iko ovasi blong konfemem se tufala i kasem wanem variant stret blong COVID-19.
Naoia ino kat eni indikesen blong eni COVID-19 keis long komuniti. Be, Efate mo ol ofsho aelan bambae oli muv iko long alet level one (medium risk) folem boda keis ia. Ol narafala pat blong Vanuatu oli remein long alet level zero (Lo risk).
COVID-19 hemi bin spred iko long plante ples raon long wol. Fulap long ol kaontri we oli ol transit point blong travel ikam long Vanuatu, oli kat ol komuniti transmisen blong COVID-19. Hemia I mekem se risk blong COVID-19 I kam long Vanuatu thru long boda blong yumi hemi hae. Ol proses mo prosidja blong ditektem mo kontenem ol keis blong COVID-19 long boda oli impoten moa blong priventem komuniti transmisen long Vanuatu.
Nambawan fasen blong protektem yuwan, family mo komuniti blong yu hemi blong kasem full vaksin akensem COVID-19. Ol recommended vaksin olsem AstraZeneca mo Sinopharm oli sef mo efektiv. Oli save daonem sivia disis, spendem taem long hospital o ded long COVID-19. Operesen blong COVID-19 Vaksinesen bambae hemi kontinu thruaot long Disemba kasem Januari. Olketa we oli no kasem COVID-19 Vaksin iet oli mas kam blong kasem vaksin naoia.
Everiwan imas kontiniu blong rifea nomo long ol ofisol infomesen sos mo nomas pasem ol kiaman infomesen. I kat ol apdeits long websaet blong Ministri blong Helt: www.covid19.gov.vu o Health Promotions Vanuatu Facebook page o kolem 119 Helt Infomesen Hotlaen.
God i kontiniu blong blesem mo protektem Vanuatu!